لازم ارحل . . دام ليل العيد ضاع سراجه= والأمل غادي . . ونور الصبح ما صالحني
والفرج . . من دون صرحه . . قافلٍ مزلاجه = والصبر مفقود . . ورياح العتب تلفحني
والفرح نادى بتكشيره . . وصك حجاجه= كم بغيت آمازحه . . لكنّ ما مازحني
يقترب . . لكنَّ لا قرَّب . . يعود ادراجه = ولا غلط في العمر لو مرة . . وجا وافرحني
عشت انا وياه . . لا نبعد . . ولا نتواجه = حلم عمري يسكن ارجائي . . ولا يبرحني
لين صار يخيفني مثل البحر . . وامواجه = ولين صرت اخطي . . ليا مني بغيت اشرحني
ولين صرت بوضع . . صعب اقفز محيط سياجه = مفرداته من وريدي . . والنغم من لحني
قلبي اللي ما عرف مدخاله . . ومخراجه= حالفٍ لعذِّبه . . ما دام ما ريحني
طيبته متناثره من موجته . . لابراجه = كلما اخفي شيّ . . بعيون العرب يفضحني
وإنت يا اللي قلبك مخالفني . . بْمنهاجه= إجمع اوجاعي . . ومن ليلة هَناك إطرحني
وإضحك لوجه الزمن . . لو لمّعه . . مكياجه = واترك امواج القهر تضويني . . وتسْـرحني
هاك قلبي وإزعجه . . لا من بغيت ازعاجه = بس اذا لك قلب . . عاتبني . . ولا تجرحني
خَل قلبي يندم بْمسراه . . وبْمعراجه = والله إن رْماح جلد الذات . . تبتذبحني
ذنبي إني اْحكي . . ولا اعرف للحكي . . ديباجه = لين هرجي . . عن مشاوير الرضا . . طوحني
صعب أعالج قلبي اللي . . فات وقت عْلاجه = دامني صادق . . بكيفه . . خله يْوضحني
إِعرف إن القلب في غيبتك . . زاد خلاجه = وإن طيفك . . من طلوع النجمه يْصبِّحني
لو يحطون القمر فـي راحتي . . ما احتاجه = وإنْ خسرتك . . فاُعْـتَـبَـر خسران . . لو اربحني
هذا أناْ راحل . . وقلبي ما خفاك إنتاجه = تعرفه . . من غير لا اصارحك . . وتصارحني
بس قبل ارحل . . تراني طالبك في حاجه =طالبك من طيب نفس . . اعذرني . . وْسامحني
احمد رده الحارثي
الله الله يابو فارس الله عليك
تجديد وتحديث في المفرده والقوافي .
قصيده منسابه كالذوب الصافي من اعالي جبال الحجاز الشامخه.
فكره وترابط وتلاعب فالجمل والالفاظ لايجيده الا شاعر جزل مبدع حتى الثماله.
كل يوم يزيد اعجابي بماتكتب يابو فارس واقول لافض فاك.
انا احد جمهورك ومشجعينك ارفع لك العقال احترام واجلال...
لازم ارحــــــــل
